立法會議員一直認為政府給予佢哋嘅實報實銷工作津貼唔夠使，令佢哋難以聘請一啲高學歷同有經驗嘅助理，要求由鄭海泉做主席嘅議員薪津獨立委員會提高津貼額，而且應該喺本立法年度內實施，以便一眾助理喺今年九月立會換屆前有望加人工。
不過，獨立委員會早前去信立會，堅持任何議員薪津變動，都應該喺下屆立法會先至生效，以免出現利益衝突，令一眾助理龍年加薪無望，認真無辜。
