政情：鄉事派民記公開割席
出名料事如神嘅「車公」，除咗警告香港今年會「神鬼不分」、「顛善倒惡」外，亦都預示沙田區今年會「人情反覆似波濤，勿謂金蘭結義高」。沙田鄉事委員會主席莫錦貴尋日喺鄉會新春午宴上宣布，鄉事派嚟緊立法會選舉肯定派人喺新界東出選，變相同合作多年、過往稱兄道弟嘅民建聯公開割席，除咗證明車公靈籤真係準到冇人有之外，亦證明咗本報之前嘅報道同樣神準！
我哋早排寫過，鄉事派喺新東同民建聯全面割裂，最可能派出擁有鄉事背景、並且得到沙田地區政團公民力量支持嘅前沙田區議會主席韋國洪出選。莫錦貴尋日話，今年新界鄉村將會再做一次大型選民登記，講明係為立會選舉而做，仲透露新東九個鄉委會同新界鄉議局主席劉皇發已經答應支持，發叔至少會捐出五十萬元選舉經費。
出席同一場合嘅韋國洪就話，呢一刻確係非常積極考慮出選，但要先衡量勝算同財力，如果勝率唔高就唔會披甲上陣。至於最受有關決定影響嘅民建聯新東立法會議員陳克勤，以及疑似會喺該區出選嘅沙田區議員葛珮帆，尋日都有出現，克勤仔聲稱建制派有多隊出選都係好事，但葛珮帆就憂心忡忡咁講咗句「都唔知點算」，比克勤仔老實好多。