政情：田二少擬爭超級區會
九月立法會選舉新增五個超級區議會議席，將成為兵家必爭之地，建制派同泛民主派都覬覦議席帶來嘅政治影響力，意圖派出多個政治明星參選密謀「坐二望三」，令最後一席嘅競爭更為激烈。據聞由前保安局局長葉劉淑儀領導嘅新民黨睇準時機，心思思想力推該黨副主席田北辰（田二少）披甲上陣。田二少去年初參加電台節目《窮富翁大作戰》做清潔工倒垃圾後，人氣急升，除咗喺去年底當選荃灣區議員外，更有望冷手執個熱煎堆出選超級區議會，究竟新民黨能否成功突圍就要拭目以待喇。
新增嘅五個超級區議會議席，由於要取得數十萬票先可以當選，所以政治影響力不容忽視。據聞建制派同泛民就參選名單已有初步諗法，前者將由區議會選舉「票后」、工聯會副會長陳婉嫻同盤據新界東多年嘅民建聯副主席劉江華披甲上陣，後者則派出至少三至四張名單同建制派對撼，包括民主黨一至兩張名單、民協和公民黨各自派出一張名單參選。
傳同建制派傾掂數
不過，有熟悉選舉嘅政界中人分析，建制派同泛民初步布陣僅可保證各取兩席，關鍵嘅最後一席至今仍冇人有十足把握。據聞新民黨研判過呢個悶局，決定力推原來有意循新界西參選嘅田二少轉戰超級區議會，希望借助之前順利當選荃灣區議員嘅好勢頭及高知名度，將最後一席手到拿來。更有傳聞話，新民黨已成功取得建制派嘅支持，已經靜靜咁傾掂數。
有消息話，其實田二少去年十一月當選區議員後，一直冇認真諗過參加超級區議會，但最近被黨友多番游說後突然變得心思思想參選。不過，亦有新民黨中人對田二少可能「棄易取難」有保留，因為一來經營多時嘅新界西或要拱手讓人，二來即使鐵定志向參選超級區議會，倘若最終「高票落敗」，勢必重挫新民黨正在壯大嘅聲勢。究竟田二少最後情歸何處，相信好快就會揭盅。