中環出更：田北俊遊奧國 湊孫滑雪
今個農曆新年凍得好有氣氛，但點凍都冇可能落雪，要滑雪就要飛到外地。好鍾意滑雪嘅旅遊發展局主席田北俊，每年聖誕節至農曆新年總會到外地滑雪，佢去年到過北海道滑雪後，今個農曆新年就選擇咗去冰天雪地嘅奧地利，過一個白雪雪嘅新春假期。不過，滑雪對田少來講都係次要，最重要係可以陪愛女、女婿同孫仔一齊享受家庭樂。
fb上載溫馨照片
一向緊貼時代脈搏嘅田少，經常都透過社交網站facebook同一眾粉絲分享佢嘅生活點滴。尋日佢又上載咗幾張旅行相，戴住太陽眼鏡嘅田少同兩個孫仔滑雪，田少嘅滑雪裝備比較簡單，反而兩個孫仔就着齊成套滑雪裝備，仲戴埋頭盔、護目鏡添，搞到好專業咁款。
田少話，六歲嘅孫仔晉仔學咗滑雪兩年，依家已經滑得好快，就嚟連佢都追唔到孫仔喇，真係想唔認老都唔得喎。卓妮見田少同孫仔身後嘅一片白茫茫雪地，雖然景色好優美，但睇見都覺得凍，但田少對住啲孫仔，相信無論幾凍都暖在心頭。