中環出更：趙樓神妙論後市 龍形波動
每年歲晚至農曆新年，商界企業舉行嘅周年晚宴同春茗接踵而來，有「K金大王」稱譽嘅胡良利（萬益）珠寶行董事長胡楚南，上周六（年廿八）都喺跑馬地山光道馬會會所大搞周年晚宴，唔少城中名人畀面撐場，來自地產界猛人就有人稱「趙樓神」嘅長實執行董事趙國雄，當晚趙樓神好幽默以龍嘅形態來妙論龍年經濟。
趙樓神話，龍嘅形態有上有落，就好似經濟一樣會有波動；而且龍又係好活潑嘅動物，活動範圍大，所以除咗香港之外，大家仲要睇埋外圍經濟環境喎。佢預期，今年市況會延續歐債危機所帶來嘅影響，加上美國大選，銀根將會繼續放寬，加息機會唔高，借貸成本低，但提醒大家入市要保持警覺性。
趙樓神仲話，「龍」係應該四圍走嘅，所以建議大家唔好困住喺香港，最好出外度歲兜番個圈，行番個大運，而佢就打算遲吓去歐洲度假，但詳情就要同家人商量吓先有決定。除咗經濟樓市外，佢仲預測埋天氣，預計今年凍嘅時期應該會長啲喎，估唔到趙樓神連風水同天氣都咁有研究喎。
講番周年晚宴，胡楚南一家總動員現身，太太莊淑蘭、大仔胡智偉、二仔胡智聰及新抱王凱曼（Carmen）、細女胡慧琪，總動員熱情招呼賓客。
胡楚南享半退休生活
胡楚南仲即場宣布，將胡良利總經理一職交畀新抱Carmen，正式接管公司業務，而佢就只會管理財政，咁就可以輕輕鬆鬆享受半退休生活，難怪佢成晚都笑到四萬咁口喇。
卓妮