房署蝦碌漏改上樓選區

廖先生為公屋輪候登記冊申請人，遞交申請時以「擴展市區」作為選區。去年七月接獲房署來信，獲悉○九年九月三十日或之前登記的申請，可將公屋選區更改為「市區」，廖隨即辦理有關手續，並於八月接獲房署發出的確認信。及至去年十二月，廖透過房署熱線查詢輪候進度時，電話錄音顯示其申請仍屬「擴展市區」組別，「我再打去問啲職員，佢一味話電腦紀錄係咁，明明都有信確認咗，點解仲係『擴展市區』？係咪有嘢搞錯咗？」

擔心拖慢輪候進度

滿腹疑惑的廖先生翌日親自到房委會查問，職員竟指其申請組別為「市區」，因房署一直未就事件作清晰交代，廖遂要求本報代為了解，經本報轉介後，房署職員始承認未有即時更新資料。廖不滿地說：「只係隔咗一日，冇理由一問完就轉咗『市區』，好明顯一路冇更新過，如果我唔問分分鐘繼續錯落去，遲咗幾個月先更新資料，都唔知會唔會拖慢個輪候進度！」

房署發言人證實，去年十二月接獲廖先生查詢後，已即時更新電腦資料，有關輪候編配進度未受影響。發言人續稱，已就事件聯絡申請人直接解釋其申請進度，並就未能及時更新電腦資料致歉。

廖先生其後證實房署已經更新資料，事情亦得到圓滿解決，但坦言仍對房署的處事大表失望，「如果冇搵《東方》幫手，佢哋根本就唔會打畀我道歉！」

「咁蝦碌嘅事我都係第一次聽！有乜理由出咗確認信都仲未更新資料？擺明係人為疏忽，房署絕對有責任交代番件事！」公屋聯會主席王坤表示，公屋選區組別出錯後果可大可小，除直接影響公屋輪候結果，更減低市民對政府部門的信心，影響部門公信力，「唔係個個申請人都識上網查申請進度，亦唔一定會打電話問住有冇錯，房署一定要謹慎處理！」王坤建議房署須就事件作嚴正檢討，避免再有同類事件發生。

記者：陳倩儀