過去多場特首選舉都有啲特別嘅人參選，好似上屆同今屆曾表態參選嘅「巴士阿叔」陳乙東就夠晒特別，如今「巴士阿叔」終於後繼有人，尋日忽然有多個報稱係百分百香港市民嘅「神秘人」簡杰鴻宣布參選。正當普羅市民唔知佢喺何方神聖時，佢就發炮批評依家幾名特首參選人作出嘅好多承諾都係空頭支票喎。
現年五十五歲嘅簡杰鴻，報稱目前係兩家公司嘅創辦人，據聞佢○七年本來都有意參加特首選舉，當時連報名表格都攞埋，但最後由於工作繁忙同準備時間不夠充分，所以冇遞表參選。
事隔五年後，簡杰鴻尋日突然又話時機成熟決定參選特首，即時用簡體字寫咗封信予傳媒宣布呢個消息。
當問及突然宣布參選係咪想自我宣傳時，簡杰鴻一口否認，又呼籲各大傳媒畀七日時間佢闡述佢嘅施政思路，仲話必定能夠滿足全部人嘅要求同期望喎。