政情：鄉局蝕本價出租禮堂
位於沙田石門嘅鄉議局新大樓設備夠晒齊全，特別係個大禮堂，裝設咗千幾萬嘅音響設備，唔單止可以做粵劇表演，開小型演唱會都仲得，所以吸引好多外界團體租用。照計租用率高應該有錢賺至係，但聽聞鄉議局收回來嘅租金都唔夠畀成本，變相做蝕本生意，點解？皆因租得太平囉！
有鄉議局中人話，過去試過以五百蚊租出場地四小時，真係唔知去邊度搵到咁平租，有錢租嚟搞活動或睇戲都唔知幾過癮。另一個例子係，有團體用幾千蚊租幾日大禮堂，但用盡成個禮堂張貼客戶廣告做宣傳，平租仲賺埋客戶廣告費，確係和味。據講局方打算搵公關公司幫手釐定合理嘅場地租金水平，希望唔使蝕錢咁冤枉。
講開又講，鄉議局早前通過以一億九千三百萬元出售旗下九龍塘金巴倫道舊大樓地皮，據聞買家提出一年成交期，但鄉議局覺得時間太長無保證，要求買家先落兩成訂金，一來等局方有啲揸拿，二來可清還幾千萬元貸款。