政情：票王逗利是終極一擊
今屆區議會選舉「票王」、北區區議員劉國勳同新界社團聯會理事呂迪明（Casta）下月就會拉埋天窗，呢個農曆新年成為佢哋最後一次搏殺逗利是嘅機會，但佢哋已開始調整心態，去迎接結婚後嘅角色轉變，即係由逗利是改為派利是。
國勳同Casta前日趁年初三赤口不宜拜年，一齊參加新界青年聯會嘅示威行動，當然亦乘機逗下利是啦。國勳話，好多長輩同街坊知道佢最後一年逗利是，於是好識做封大封啲利是畀佢，但因應明年要開始派利是，佢都開始自行調整心態，唔會再好似以前咁主動逗利是喎。
至於即將成為劉太嘅Casta，唔好睇佢平時紮紮跳活力十足，原來為人都好傳統。Casta話，自己一直按家鄉傳統未到正月十五都唔會拆利是，唔知明年角色轉變之後，會否唔慣呢？