自從「拳頭幫」人民力量成立後，民主黨一直被狙擊到有得震無得瞓，新年流流人民力量就放過白鴿黨一馬，成班骨幹成員去咗黃毓民嘅屋企拜年。一大班人當然唔少得開枱打牌，但佢哋就好罕有咁推牌九。
人民力量主席劉嘉鴻話，牌九刺激好多，因為牌九鋪鋪快上快落，唔使慢慢摸牌，比打麻雀過癮好多。
不過，佢話約埋上毓民屋企，最主要唔係推牌九，而係食嘢，事關大家都知毓民識飲識食，仲親自落廚煮幾味撚手潮州菜，包括凍烏頭、大地魚蒸雞等。毓民落廚，咁佢老婆去咗邊？原來黃太去咗美國陪細仔。
幾個巨頭難得聚埋一齊，到底有無商討九月立法會選舉嘅部署呢？「大舊」陳偉業話，自己都做咗咁多年議員，如果有新人可以頂上就最好喇，但如果無人肯接棒，咪做多一屆囉！