中環出更：鄧鉅明盼中國一人一靚錶
好多經濟學家都預測今年經濟前景唔明朗，但中國就例外，特別係唔少鐘錶業界人士都睇好中國市場，話好多中國人都鍾意買瑞士腕錶，鍾意其款式高雅又保值，作為鐘錶界翹楚嘅太子珠寶鐘錶主席鄧鉅明（Jimmy）話，只要中國一人買一隻靚錶，真係唔憂冇得做。
陳正欣料平穩增長
專做卡地亞中國代理同瑞士名錶IWC中國及香港代理嘅保良局總理陳正欣（Daniel）話，全球鐘錶業交易，超過一半來自中國，可見中國人嘅消費力驚人。Daniel仲話，多咗人買錶保值擴大咗成個鐘錶市場，連帶畀咗好多機會其他新品牌上位。Daniel預料，今年鐘錶業仍有平穩增長，但速度會稍為放緩。
Jimmy就話，中國仲有好多省市未開放，未來潛力將會非常大，佢話公司早前喺上海開分店，嚟緊諗住喺北京開多間。Jimmy笑笑口話，雖然人人都唔睇好今年前景，但佢覺得呢個係擴充業務好時機，仲話如果見到內地商舖租金有放緩迹象，唔排除會租多幾個地方喎。