中環出更：媽打五姊妹 齊齊着裙褂
那些年着裙褂嘅日子，相信女士們會好懷念。社交名人李桂蘭（Olivia）早前就趁姨甥女Anne擺結婚酒，捉埋曾任民政事務局常秘嘅家姐李麗娟同三位姐姐一齊着起裙褂，「五朵金花」有睇頭又夠晒特別。
Olivia姨甥女Anne同外籍男友John去年底喺美國結婚後，日前回港筵開四圍，宴請女家親友。媽打李麗娟於是號召四姊妹走去旺角租裙褂，一齊着住出席宴會高興吓，大家搭晒膊頭影相，齊齊回到出嫁時。
45年後再聚首過新春
李家人強馬壯，除咗五朵金花外，仲有四個男丁，即係共九兄弟姊妹。Olivia話，大家平日分散美加及香港，已有四十五年無聚埋一齊過新年，今次難得二家姐嫁女，李家成員又排排坐聚首一堂慶新春。
講到龍年願望，Olivia話，子女開心已心滿意足。佢囝囝戴尚安今年有意籌組影視製作公司，千金戴尚蓮喺英國Burberry公司擔任創意媒體總監，仔女都咁叻，當然飲得杯落啦！