新年流流，最緊要一團和氣，開開心心，俗語都有話啦，和氣生財吖嘛。不過好可惜，新年伊始，香港人就被北京大學一隻亂咁吠嘅「狗噏」教授搞到相當火滾，睇嚟呢個龍年都好難有太平日子過咯。
其他唔講吖，就講最近鬧得沸沸揚揚嘅中港居民矛盾，已經唔到你唔擔心。雙非孕婦闖關產子、名店禁攝風波、內地惡爸大鬧醫院、內地兒童港鐵食麵引致罵戰事件……兩地居民嘅摩擦無日無之，本來已經好易擦槍走火，傷及同胞感情，點知踏入龍年，呢種對立情緒非但無緩和迹象，反而仲不斷升溫添。
嗱，今日係年初三，俗稱「赤口」，網上對準雙非孕婦嘅言論一浪高過一浪，真係炮聲隆隆。有人喺社交網站設立「反蝗專頁」，睇個名就知係針對邊個；亦有網民改編流行曲，歌詞充滿對雙非兒童佔用香港資源嘅怨氣。赤口，赤口，果然係相嗌唔好口。
講到呢度，功夫茶實在有必要問問港府，中港居民矛盾日深，積怨日多，再咁落去，會唔會一發不可收拾，愈搞愈大鑊㗎？嗱嗱嗱，功夫茶唔係杞人憂天㗎，一來呢個世界總有「狗噏」教授一類唯恐天下不亂嘅人，一句不像人話嘅瘋言瘋語，就可以激化中港對立；二來咯喎，港府高官渾渾噩噩，袖手旁觀，想唔出事都幾難。一句講晒，中港居民摩擦增多，港府唔當一回事，隨時演變成另一場衝擊香港嘅禍水。
冇錯，中港民間互相排拒，點講都唔係一個好現象，港府必須諗計疏導至得。不過講起真係諷刺，寄望港府撥亂反正，呢個新年願望恐怕都好難實現，事關搞出今日局面嘅始作俑者，正正就係呢班胡混度日嘅港產官僚。
試問，係邊個阻截內地孕婦不力，搞到香港大肚婆腹大便便都要冒雨上街示威？又係邊個對內地資金炒高香港樓價熟視無睹，搞到香港民怨沸騰？仲有吖，夕陽政府得過且過等收工，龍年效應之下，內地孕婦大軍兵臨城下，本港醫院嗌晒救命，但港府居然唔嗲唔吊，只係推出四招治標唔治本嘅所謂行政措施，你話呢班「退伍高官」係咪無心無肺無靈魂吖！
中國人以和為貴，香港人更加一向講道理，但係對住狗形人體，就一定唔會客氣。「狗噏」教授挑釁港人，尋日仲死不認錯，繼續死撐，香港人必定唔會放過佢。同樣道理，港府種下中港矛盾禍根，難辭其咎，如果唔快快補鑊，港人一樣唔會饒過佢哋！