大年初二，繼續恭喜發財！繼續龍馬精神！繼續萬事如意！總而言之，喜氣洋洋唔好畀佢停！
如果真係要喜氣洋洋，功夫茶諗到一個皆大歡喜嘅方法。呢一個方法非常之咁簡單，事關年初十就係財政司司長曾俊華發表任內最後一份財政預算案嘅日子，只要鬍鬚曾一改常態，唔再做一個孤寒成性嘅守財奴，開倉派米紓解民困就會喜氣洋洋㗎喇。就好似派利是，試問𢭃利是嗰個點會唔開心？
曾俊華自己都透過個人網誌話喎，正忙於為已成形嘅預算案最後修飾，希望能於年初十宣讀當天，為市民帶來新春祥兆。嗱，男子漢大丈夫唔好講過唔算數呀，新春祥兆呢家嘢，千祈唔好呃鬼食豆腐，否則最近被北大流氓教授形容為「狗」而搞到心火盛嘅香港人，一定唔會收貨㗎。
對於香港財政，會計師係咁估計嘅，受到賣地收入帶動，加上利得稅及薪俸稅收入都高於預期，政府將會錄得約五百億元盈餘，遠勝計錯數嘅八十五億元虧蝕。既然有錢在手，人民力量立法會議員陳偉業就話嘞，政府應該以現金向全民派發盈餘，具體金額係八千元。對於有人認為直接派錢紓困欠缺針對性，陳偉業認為如果只係退稅回饋納稅人，最終未能惠及基層，反而有機會拉闊貧富差距，導致貧者愈貧、富者愈富。
當然，功夫茶明白好多政黨人士都唔太贊成再次派錢，正如紫荊俠話齋，大富豪都有錢派，人人有六千，簡直大錯特錯。問題係，如果只係退稅，咁又真係無法令到冇墮入稅網嘅低下階層受惠喎，咁點算好呢？
呢嗱嗱嗱，咪話新年流流功夫茶唔醒你，鬍鬚曾大可兩全其美，有份交稅嘅就退稅，冇份交稅嘅就派錢，咁咪一天都光晒囉！
之不過咁，有一件事令人猶有餘悸，曾俊華呢一位哥哥仔唔係咁鍾意聽人意見，否則舊年都唔會搞出一份「史上最廢」嘅預算案獻世。鬍鬚曾仲有一種類似被虐狂嘅怪癖，係都要激到全人類喊打喊殺先至改變初衷，舊年本來打死都唔肯派錢㗎，後來群眾壓力逼到佢跪低。換句話說，莫講話陳偉業嘅意見未必肯聽，功夫茶嘅建議亦都未必接受，到頭來又係搞到民怨沸騰。
不如咁啦，既然曾俊華唔被虐唔過癮，功夫茶就不妨事先張揚兇佢一兇。嗱，年初十開倉日，唔理你係退稅定係派錢，一定要達到利民紓困嘅目標，否則咯喎，包圍「門常開」嘅示威抗議肯定一浪接一浪。
一句到尾，不紓困不罷休，香港人即使係狗，都係忠肝義膽嘅狗，專咬朱門酒肉臭嘅孤寒財主！