【本報訊】小朋友大哭會令家長感到困擾，心情往往變得煩躁。有本港心理學家建議家長須控制好自己情緒，才能安撫「扭計」狂哭的子女。若果真的不能忍受小朋友哭聲，家長可把子女暫時交託信得過的親友看管，自己則離開現場冷靜一下。
新領域智能發展中心註冊教育心理學家彭智華表示，家長在生育前應該學習忍耐兒童的叫喊聲：「尤其係後生嘅家長，佢哋好少聽到小朋友狂喊，所以生仔前，錄起小朋友嘅喊聲，睇吓可以忍幾耐，做定準備，需要盡量忍受，由五分鐘、十分鐘逐漸加上去。」
若不能忍受小朋友喊聲，家長應在小朋友安全情況下將小孩交由他人看管，自己則盡快離開現場冷靜：「如果小朋友喺街度喊，家長會好尷尬，所以要畀時間自己處理情緒，商場後樓梯係好地方。如果走唔到，就設法滿足或者遷就小朋友嘅需要，好似畀粒糖佢食。」
另外，彭智華又從「眼、耳、口、手」教家長安撫小朋友：「小朋友狂喊可能係因為受驚，可以畀佢聽柔和嘅音樂，好似《搖籃曲》，唔好鬧小朋友，應以平和語調氹佢哋，要令佢哋放鬆。視覺方面，畀啲圖畫或者玩具佢哋玩，以分散注意力。口方面可以畀支奶佢哋飲。而小朋友最信任嘅人嘅一個擁抱，都可以令佢哋好有安全感，咁就唔會喊！」