淫審制度千瘡百孔唔使多講，否則淫賤黎旗下壹淫媒都唔會肆無忌憚誨淫誨盜。既然係千瘡百孔，係咪應該大刀闊斧改革呢？冇錯，係應該嘅，問題係政府冇誠意。
商務及經濟發展局話喎，早於○九年完成《淫褻及不雅物品管制條例》第一階段公眾諮詢，為咗增加淫審處嘅代表性，審裁員總數由三百四十人增至五百人，並將審裁員嘅委任期設限至九年。
吓？其他乜鬼都冇，淨係增加人手，咁就算係改革？有冇兒戲啲呀！
呢嗱嗱嗱，現行制度真係好有問題㗎。淫審處負責將影視處送檢嘅物品評定類別嘅行政工作，但當案件進入司法程序之後，法庭可將已評級嘅物品發還淫審處再評級，過去多次出現同一物品重複評級，導致淫審處角色混淆。於是乎，司法機構建議將淫審處行政司法分家。不過可惜吖，行政司法分家嘅建議不獲接納。
計功夫茶話齋，諮詢係假嘅，改革係假嘅，做戲先至真。
正如立法會議員陳偉業質疑，以為增加審裁員就可以增加代表性嘅概念大錯特錯。香港城市大學專業進修學院學術統籌宋立功就批評，增加審裁員數目並不能解決執法緩慢嘅根本問題，不良傳媒隨時睇準制度弱點，變本加厲散播不良資訊，選擇性執法同多重標準嘅不公平結果仍會繼續出現。
乜嘢叫做選擇性執法同多重標準？呢家嘢，淫賤黎永遠係得益者，東方報業集團永遠係受害者。○五年十二月《東方日報》及《太陽報》刊登外國女星Kelly Brook嘅打格性感照片；《蘋果日報》同日刊登同一輯照片；在港有售嘅外國雜誌《NOW》更加係無遮無掩，完全冇將敏感部位打格仔。淫審處最後只將《東方日報》及《太陽報》評為第二類物品，分別罰款一萬五千元及一萬二千元，刊登同一輯照片嘅《蘋果日報》竟然評為第一類非不雅刊物，《NOW》就連送檢都冇，莫講話評級。咁唔公平嘅做法，明顯就係三重標準。
講到淫賤黎得益，絕對唔係講笑，壹淫媒違反《淫褻及不雅物品管制條例》過百次，從來冇一次認真處理，餐餐都係輕輕罰款雞碎咁多了事。至於新近獻世派通街嘅《爽報》，宣淫能力更加驚人，出版短短幾個月已經累積二十幾次被評為第二類不雅。問題係，犯罪纍纍都逍遙法外，你吹咩！
所以話啫，所謂改革只係虛晃一招，淫審處依舊親疏有別，淪為打壓正義傳媒、包庇亂港淫媒嘅政治工具。鬼叫香港仍然由港英餘孽把持，由始至終同壹淫媒沆瀣一氣，搞到香港繼續烏煙瘴氣！