影視處及淫審處明明處處漏洞又唔肯着意改革，尤其唔肯接納司法機構要求淫審處行政司法分家嘅建議。
「斜」氣沖天嘅影視處及淫審處，臨收工都唔肯好好去收拾潔淨，縮骨政府敗家氣象早逞！有立法會議員質疑淫審處唔專業，尤其涉及淫審條例嘅投訴漸多，但處方經常不能實時處理，拖得就拖，形同放生違反淫審條例嘅不良傳媒。
當然，影視處及淫審處嘅選擇性執法及多重標準，屢次針對東方報業集團事件，尤其令人髮指，要不是東方報業集團財雄，威猛精明，追求公平公正公義之火永不熄滅，都唔知要遭受幾多更無辜嘅指控及針對！
政府高高在上，對一個咁唔專業嘅機構縱容，令其胡搞下去，除了鬧笑話丟人現眼，如將「大衞像」評為第二類不雅淪為國際笑話，同一輯Kelly Brook照片竟有三種標準，評審未能做到「奉方寸如嚴師」都算咯，之不過，明顯放生淫媒而針對正義傳媒，呢種咁骯髒嘅手法，對一個所謂「法治社會」——就係最大的諷刺！
嗱！唔好話老朽唔提醒有關當局，壹淫媒旗下嘅《爽報》，渲染色情暴力，自面世幾個月以來，學校、老師、家長、團體投訴不絕，淫審處裁定其不雅個案已累積二十幾宗，證據都吊在佢哋鼻上，卻又久唔跟進，搞到立會要召開聯席會議施壓，你話淫審處唔係縱容淫媒，咁又係乜呢？見微知著，夕陽政府敗葉滿山，果如大仙所料政局多兇險。