廣華醫院今年一百周年紀念，正當大家大事慶祝嘅同時，亦喚起大家對廣華醫院重建嘅關注，其實醫院四年前已提議重建，可惜政府一直闊佬懶理，寧願做守財奴都唔肯撥款重建。該院重建委員會小組成員葉維晉話，醫院樓面負重力有限，令好多X光機器都放唔到，而手術室只有十三間，數量太少，加上急症室空間不足，容易增加交叉感染機會，所以重建係有急切需要。
