政情：煲呔曾行花市驚中「蕉」
曾經幾次畀議員掟蕉鬧爆嘅煲呔曾，依家聞蕉色變。話說最後一次以高官身份行年宵花市嘅煲呔曾，尋日朝早九點半鐘忽然通知傳媒，話兩小時後去行元朗年宵市場，都唔知係咪想避開啲示威，相當鬼祟。唔知係咪煲呔曾心中有鬼兼有「蕉」，期間有個八十後嘅後生仔上前向佢推銷一個名叫「出蕉」嘅布公仔時，佢即時聞蕉色變。
當個後生仔突然向煲呔曾「出蕉」後，煲呔曾就露出錯愕表情，佢身邊嘅保安隨即如臨大敵，將個後生仔當示威者咁隔開，其實個後生仔只係諗住推銷隻「出蕉」布公仔啫。嗰位後生仔姓黎，係嶺南大學三年級學生，強調自己毫無惡意，可惜被保安隔開咗，佢質疑煲呔曾行花市係咪真係睇到年宵嘅情況，表現差強人意。
黎同學批評：「佢（煲呔曾）話刺激港人生育，但雙非孕婦問題一直都未解決，即係唔係鼓勵生育啦！」當煲呔曾兩公婆離開時，有記者就問佢截「雙非」四招治標不治本，佢即刻轉身走人。