政情：CY太挺老公擁赤子心
特首選舉進入白熱化階段，兩位特首參選人梁振英（CY）同唐英年嘅太太日前罕有接受電子傳媒訪問，暢談感情生活。其中CY嘅太太唐青儀以往一直專心做賢內助，行事十分低調，如今肯做訪問將自己私事公開，話唔係幫老公助選都冇人信。
梁太話，佢同CY係英國求學時嘅同學，兩人喺校友聚會中認識，由於當時CY啱啱畢業返港發展，事業剛起步，兩個只可以靠「一日一信」去維繫呢段異地戀。梁太笑言，CY嗰時追佢好落力，老公做嘢一向好積極，努力嘅程度同今次參選有得揮喎。佢又話，從來唔覺CY有野心，有嘅最多係赤子之心。
郭妤淺指冇完美婚姻
至於唐太郭妤淺就喺訪問中話，自己同唐唐結婚廿七年，雖然丈夫曾經「出軌」，但至今呢段關係比以往更穩固。佢又話，冇一段婚姻係完美，只要犯錯後肯承認、原諒同放低，肯一齊向前看，呢個都係勇氣嘅表現，佢仲希望永遠做唐唐背後嘅女人同最真誠嘅朋友喎。