政情：高官龍年運勢好壞參半
龍年將至，又係時候預測吓香港龍年運程同高官運勢，今年繼續搵番過去預測相當準確嘅香港術數家協會術數師楊子東作詳細分析。先講香港龍年運程，楊師傅話，龍年立春係西曆二月四日，以立春八字分析，最大特點係五行欠火，食傷不顯，意味懷才不遇，屬表面風光之象；而且財星被合，出現比劫爭財，生意發展空間不大，大機構會大量裁員，極為不妙。
如果好似楊師傅所言，龍年本港經濟表面風光，就更加要靠政府施政力撐，只可惜港人面對嘅係一個夕陽政府，好多庸官都係Hea住等收工，當中佼佼者非「雙曾」煲呔曾同鬍鬚曾呢對哎吔兄弟莫屬。
楊師傅批算兩人嘅八字後話，煲呔曾會喺農曆三月精神恍惚、易出錯，即係話臨執包袱前都可能會搞鑊大大鑊嘅，就算離任後嘅農曆九月，亦可能會同太太爆爭拗。
唔單止咁，楊師傅話煲呔曾今年財星受衝擊，雖然佢唔係主力負責財政事務，但身為夕陽政府領導人，講白啲就乜都關佢事，一日喺佢領導之下，香港盤數真係凍過水。煲呔曾運程欠佳，佢個哎吔細佬鬍鬚曾嘅運程亦都麻麻。鬍鬚曾命格行土運，發展不大，意味留任下屆政府嘅機會不大。楊師傅仲話，鬍鬚曾喺農曆五月要特別注意身體健康。
孫公「洩氣太重 理應下台」
除咗雙曾外，好多市民都關心患有腎病、之前又感染「退伍軍人症」痊愈嘅教育局局長孫明揚嘅龍年運勢。楊師傅去年初貼中孫公喺兔年健康不濟，真係好嘅唔靈醜嘅靈，搞到個心都唔好過，所以佢批算孫公龍年運程後，就好隱晦話：「（孫公）洩氣太重，理應下台，五月健康差。」再追問下，楊師傅才肯講：「佢本身身體已經好差，嚟緊要退落嚟，可以頤養天年已經好好。」明白晒，新年流流，總之希望大家身體健康啦。
不過，龍年亦有行好運嘅高官，就係公務員事務局局長俞宗怡及發展局局長林鄭月娥。
楊師傅話，雖然俞局長犯太歲，但佢「大運與流年配合，有驚無險」，而林鄭就更加係「流年與八字配合，依然有本錢，可以繼續強硬」。照師傅咁講，唔通兩人有機會留任？