中環出更：商界政黨 落區大派揮春

年近歲晚，大家都忙住辦年貨，卓妮尋日下午路過灣仔太原街（玩具街）時見人頭湧湧，期間離遠見到西裝骨骨嘅自由黨立法會議員方剛被一班街坊「圍」，唔通有事發生？後來行到埋去先知原來佢落區探訪啲檔戶，順便派發「福」字賀年揮春，引來街坊爭相索取，部分街坊仲認得佢，大讚佢後生又靚仔之餘，仲叫佢去選特首添，搶盡風頭。
方剛（右一）探訪灣仔太原街檔戶，順便派發賀年揮春，吸引大批街坊向佢打招呼。（溫國佳攝）
方剛（右一）探訪灣仔太原街檔戶，順便派發賀年揮春，吸引大批街坊向佢打招呼。（溫國佳攝）

許曉暉即席揮毫

查實春節期間都有唔少黨派趁機會做騷，好似自由黨嘅「對家」經濟動力召集人林健鋒及梁君彥，前日都拉埋民政事務局副局長許曉暉（Florence）去佢哋維園年宵攤位寫揮春，Florence仲即席揮毫，寫咗張「學業進步」送畀街坊添！民主黨今年都有喺維園年宵擺檔，副主席劉慧卿尋日朝早就為年宵檔開張撐場，但卿姐話自己手毛筆字唔係好見得人，所以唔會寫揮春喎。

林健鋒（右）與梁君彥（左）請來許曉暉（中）到年宵攤檔寫揮春。
  • 林健鋒（右）與梁君彥（左）請來許曉暉（中）到年宵攤檔寫揮春。

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能，財經資訊，實時實發！