中環出更：80後鄭承峰斥千萬開食肆
仁濟醫院副主席鄭承峰（Baldwin）最近喜事連連，上個月佢獲委任為東區區議員，年僅廿八歲，成為備受矚目嘅政壇新星。咁仲未夠，本周二傍晚，佢斥資逾千萬元開設嘅食肆「壹玖捌叁」，喺跑馬地載德街隆重開幕，仁濟一眾總理及老友都去撐場助興，恭喜聲不絕於耳，場面好熱鬧。
主打「香港菜」
當日現身嘅仁濟總理有周德興、黃美斯、馮卓能等人，一班青年才俊舉杯暢談，零舍啱傾。法國五大酒莊之一瑪哥酒莊（Chateau Margaux）董事總經理嘅囝囝Thibault Pontallier亦畀面到賀，Baldwin從事靚酒生意，兩人合作多年，品味相投。
講起間餐廳，點解改個「壹玖捌叁」咁得意嘅名呢？原來一九八三年係Baldwin出生年份，打正旗號話畀大家知，佢係散發正能量嘅「八十後」。Baldwin話，餐廳主打「香港菜」，即係除咗地道粵菜外，所有來自五湖四海嘅外省菜或外國菜，只要引入香港並廣為港人接受，都可以叫做香港菜，夠晒包容。為咗凸顯餐廳嘅特色，佢仲入咗唔少八三年嘅葡萄酒，認真有心思。
當日餐廳總廚棠哥特登炮製多款美食以饗賓客，包括鵝肝蝦餃、鮑魚燒賣，將耳熟能詳嘅點心變得貴氣惹味，食到大家讚不絕口。
卓妮