添馬艦新政府總部出現「禍水」，水管充滿退伍軍人症桿菌，搞到教育局局長孫明揚中招。禍水之源到底來自何方呢？功夫茶唔係專家，當然答你唔到，淨係知道監管不力肯定係罪魁禍首。之不過咁，係人都知香港食水來自偉大祖國嘅東江，假如東江水受到污染，會唔會導致禍水侵襲政治心臟呢？呢個問題真係值得研究研究。
東江水今年起連續三年加價，理論上一分錢一分貨，水質應該更加優良。可惜事與願違，東江水原來已經變成令人作嘔嘅污臭禍水！
作為供港東江水最後一站，深圳水庫近期被投訴污染嚴重。本報記者當然義不容辭走去實地視察，為民請命吖嘛，一去到實地，嘩嘩嘩嘩嘩！視察結果令人目瞪口呆，嚇到呆咗嗰隻。
流入水庫嘅河涌不但遍布垃圾，更加隨處可見糞便、死老鼠、用過嘅避孕套等等惡心物品。仲有吖，水庫旁邊有人違規種菜，有人洗衫洗褲，農藥化肥同洗衣粉源源不絕流入水庫。
深圳水庫基本上係一個冇掩雞籠，話就話「飲用水水源一級保護區」，實際上毫無保護可言，有人去釣魚，有人去燒烤，有人去洗車，有人甚至聯群結伴跳落去游水，簡直就係一處歡笑樂園開心地，不過代價係製造大量污染物質咁解。你知啦，中國人最鍾意隨處便溺，一個二個嬉戲人士貪圖方便，河邊一踎低就亂咁開大開細，落雨之後穢物隨波逐流直入水庫，真係諗起都想嘔！
搞成咁，難怪環保人士形容深圳水庫係「臭水收集站」。功夫茶想問一問中港兩地負責供水任務嘅官老爺，香港人係咪賤到要飲臭水呀？飲到條命仔即時退伍點算呀？
冇耐之前，粵港政府落實簽署東江水供水新協議，購買東江水嘅費用由今年三十五億三千八百萬元，逐年增加至二○一四年嘅三十九億六千萬元，每年增幅約百分之五點八。發展局局長林鄭月娥更加一連兩天專程拜訪廣東省，親自參觀過深圳水庫。林鄭局長又同廣東省檢討東江水質嘅監測工作，粵方話喎，會繼續加強保護供港東江水嘅水質，確保水質符合國家「地表水環境質量標準」。
喂，乜嘢叫做加強保護水質？莫非任由穢物污染水庫居然係保護手段之一？唔好玩啦，肯定係深圳水務局嘅失職官僚管治疏懶，搞到污臭禍水東江來。
功夫茶千唔該萬唔該，香港水務署真係要嚴肅跟進，狠狠要求深圳水務局有效保護水源。浪費金錢買污水都仲係次要，萬一飲到香港人個個五顏六色，慢性中毒搞到條命仔提早退伍，邊個害人官僚賠得起呀！