政府對基層關注不足，利民紓困得個噏字，每次被轟「守財奴」時，鬍鬚曾最叻一句：應使得使！好似當家有術咁款，其實政府浪費公帑，每年審計署的報告都羅列一大堆，說罄竹難書一點都不為過。
對基層就死閂水喉，而政府不少部門就水長流！嗱，最近本報「專題新聞」又有傑作，唔講都唔知，煲呔曾呢位「氣候逃犯」原來最嘥電，其居住及辦公的禮賓府，連續兩年度用電量勁升，每月電費高達二十萬元。
嘩！一年用電都二百四十萬，真係唔講唔知道，一講嚇一跳！禮賓府就算日夜有人辦公，夜夜笙歌接待賓客，煲呔曾夜裏挑燈賞錦鯉——都唔使用咁多電啩？
香港搞環保之所以搞極都見唔到藍天，一句講晒：上樑不正下樑歪，想當年環境局局長邱騰華仲話要推行乜鬼「慳電膽」，如今諗起確得啖笑！
煲呔曾臨走，睇怕除了搞個萬千燈火賀下台，更要大放煙火激光。真是高低貴賤各不同，曾爵士已非昔日「寂寞推銷員」，有啲排場也是應該的！
老朽思想較傳統，總覺得在上者行清廉之政較可取，位高更要把自己的心靈位置安好，一如曾國藩所說：「精力雖止八分，卻要用到十分。權勢即有十分，只可出五分，庶近勞謙之道。」視民望如浮雲嘅煲呔曾大概聽不入耳。老朽仍深信，為政而能儉，可以正風氣，可以惜後福。縮骨有運行，惟煲呔曾一人，香港果真係佢福地也。