政情：刊物露玄機 華員會撐CY？

之前有傳唔少公務員較為支持特首參選人唐英年（唐唐），美其名係話佢肯聽公務員意見，實際就係貪佢夠蠢容易畀班下屬點。不過，擁有最多會員嘅公務員團體華員會，就喺新一期《華員報》整咗個特首選舉特輯，總結咗三位參選人嘅政綱同理念，但篇幅同排版就明顯親疏有別，疑似暗撐另一參選人梁振英（CY），令人覺得公務員都唔係完全唔聽民意。

《華員報》首先介紹CY嘅政綱，之後先到唐英年同民主黨主席何俊仁（鐵頭仁）。其中CY嗰部分有成五版紙，非常詳盡，標題《由心出發　穩中求變》裏面個「心」字，更加特意用咗紅色印刷，相當搶眼同有心思。反觀唐唐嘅介紹就只有兩版紙，標題用色單調；至於表明只係陪跑嘅鐵頭仁就更加只得一版紙。總括三人嘅版面鋪排，唔知大家有冇同感佢哋暗撐CY呢？

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能，財經資訊，實時實發！