政情：扮嘢文拜早年冇扮嘢
海洋公園同香港迪士尼樂園競爭相當激烈，做高層嘅真係少啲計謀都唔得。好似海洋公園主席盛智文（扮嘢文）就經常粉墨登場扮嘢做宣傳，每逢大時大節都有新搞作。不過，扮嘢文尋日宣傳新春開運大團拜節目時，竟然唔扮嘢兼着得好正經，只係着住唐裝棉衲，同兩位管理層成員及一班吉祥動物一齊，向市民拜個早年。
扮嘢文率領行政總裁苗樂文及副行政總裁李繩宗，聯同吉祥物「威威獅令」、「樂天豚長」、「占士鯊」及「小鸚雄」率先向港人拜年，祝願大家喜躍龍門，步步高陞。年廿六就咁好口，梗係想宣傳公園嘅新春活動喇，今年安排咗十六位藝高人膽大嘅全女班鼓手到海濱樂園表演「高臺花鼓」，包括孔雀開屏及鳳凰展翼等花式排陣，仲有變臉及少林功夫表演等，相當精彩。