本報早喺上周六揭發添馬艦新立法會大樓室內空氣有毒，總揮發性有機化合物（TVOC）水平一度嚴重超標十七倍，隨時令一眾男議員絕後、女議員生乳癌。經過一連多日嘅「換氣」行動，尋日新大樓大部分樓層嘅「毒氣」水平都已符合標準，唯獨七樓仍然超標。不過，設喺呢層樓嘅部分議員係出名嘅大懶蟲，即係空氣有毒都影響唔大囉！
喺新大樓七樓辦公嘅議員，包括兩大立會懶蟲金融界李國寶及體育界霍震霆，佢哋連大會都經常遲到早退、甚至唔出席，何況返議辦做嘢呢？相信毒氣都毒唔到佢哋。不過，喺同樓層工作嘅四名專業會議議員中，以何鍾泰出晒名係工作狂，成日喺立法會做通宵，另有兩名秘書處職員日日喺度辦公，應該戴個防毒面具返工。
有議員估計，七樓毒氣水平超標，主因係喺呢層樓嘅議辦最遲入伙，有關裝修同執漏工程亦較遲進行，因而毒氣遲遲未散，相信換多幾日氣就會達標。