民主黨立法會議員黃成智前日聲稱喺旺角過馬路時畀人踢咗一腳，之後就大鑼大鼓召開記者會話事件好明顯係有人存心攻擊，又話唔排除同人民力量有關。不過，成智嘅言論隨即畀人民力量回敬話唔排除民主黨作大，而佢喺記者會期間以英文回應嘅片段，喺社交網站Facebook（fb）被網民寸爆，彈佢啲英文差過小學雞。
有網民話，成智啲英文不但衰過之前講「try our breast」嘅克勤仔，仲話成智啲英文認真聽死人，睇嚟需要請一個翻譯嚟幫吓手。我哋睇番段片，發現成智嘅講話斷截禾蟲，除咗講唔到人民力量嘅英文名外，就連「黃毓民」嘅英文名都唔係好識，淨係求其講番中文諧音算數。如果有外國人睇到呢段片，睇怕唔知佢講乜。
另外，聲稱喺台灣國民黨總部被人民力量黃毓民打嘅民主黨中常委馮煒光，尋日去咗立法會申訴部投訴毓民，佢向立法會秘書處提供咗兩段錄影片段，又話現場又有好多人可以證明毓民有郁手，要求立法會按程序跟進，仲話要約見毓民等人添。有人民力量成員尋日喺Facebook轉貼一幅相（小圖），要求大家杯葛《蘋果日報》亂報。