政情：煲呔曾夕陽騷 十足苟延殘喘

煲呔曾準備執包袱卸任，連管治班子都眾叛親離，舉行答問大會嘅會議廳內空櫈多到無倫，即使有到嘅議員亦都係遲到早退，而多位建制派議員都懶得出席，除咗霍震霆、黃宜弘外，民建聯嘅黃容根、主席譚耀宗都唔見影，至於行政會議成員方面就只有劉遵義默默撐場，如此下場真係可悲。

雖然親信眾叛親離，但收緊人工嘅所有局長同副局長就唔敢唔出席，就連啱啱離開「退伍軍人」行列嘅教育局局長孫明揚（孫公）都有現身，可能佢希望可以再下一城，趕走即將「退伍」政府嘅頹氣。可惜佢大病剛愈，終告失敗，最後都不敵睡魔，頻頻釣魚。被煲呔曾催眠嘅仲有鄉議局主席劉皇發，好彩長毛擲糖時擲醒佢，難怪發叔話呢一擲令佢「回一回魂」，咁咪應該多謝長毛？

煲呔曾帶病上場，但聲沙未能蓋過佢輕挑懶寸嘅驕橫氣燄。當醫學界梁家騮問佢醫療政策時，佢忽然懶幽默話，梁家騮身為醫學界議員應該清楚過佢喎。當自由黨劉健儀問佢有關瑪麗醫院重建問題時，煲呔曾又忽然好佻脫咁話自己對瑪麗醫院、廣華醫院嘅重建方面「情有獨鍾」，實在唔知佢想講乜。

「一定要忽略貧富懸殊」

不過，按以往經驗，煲呔曾寸嘴寸寸吓就會講錯嘢，繼明言「貧富懸殊係資本主義社會必然產物」後，尋日又再亂噏話政府「一定要忽略貧富懸殊」，又將領綜援人數由四十萬講咗四百萬，或者佢潛意識都知「蔭權七年」如何深化貧富懸殊。

夕陽政府無人撐，就連示威者都唔理煲呔曾，尋日立法會外嘅示威區，除咗有幾十個鐵馬同幾架警車嚴陣以待、獨守示威區外，示威人士一個都無，直情可以用冷清嚟形容，梗係啦，呢個夕陽政府得番唔夠半年任期，同佢示威不如慳番啖氣暖肚好過。