中環出更：施榮忻 洪為民 同情劏房戶
劏房擠迫戶係本港棘手嘅城市問題，可惜夕陽政府一直視若無睹。百仁基金主席施榮忻（Jaime）前日聯同菁英會主席洪為民（Witman）探訪深水埗區嘅劏房戶，佢哋慨嘆香港現在表面風光，窮人想找一塊瓦遮頭都唔容易。
自掏腰包義助
初次到訪劏房戶，眼見住喺只有八十呎蝸居嘅盧女士同兒子，呢家人正面臨業主收樓，住埋三月就要搬走，搞到Jaime同Witman當堂心都翳埋。靠綜援度日嘅盧女士，因為居港未夠七年，唔合資格申請公屋，可憐迫遷日子愈來愈近，佢同七歲兒子隨時淪落街頭。Jaime決定自掏腰包，資助盧女士租樓一年，以解燃眉之急。
Jaime話，劏房嘅存在，可能未必合法，但現實生活中，唔少無殼一族卻連蝸居也租唔起，躋身劏房，只求一處容身。佢批評政府口口聲聲話要取締劏房，但卻未為貧苦大眾提供足夠低廉住所，咁做只會逼窮人走上絕路，造成更多社會悲劇。