中環出更：張雅麗偕囝囝新西蘭做農夫
新西蘭熱氣球奪命意外嚇怕唔少人，但當地旅遊人氣依然旺盛。菁英會副司庫張雅麗（Carol）早前先至同六歲囝囝晉熙暢遊新西蘭，一嘗餵綿羊、食農場雞蛋嘅滋味，吸啖新鮮空氣，皮膚都靚啲。
Carol一向係廿四孝媽咪，聽見囝囝恨見識吓何謂農場，二話不說飛去新西蘭睇「實景」。兩母子齊齊入住農場，清早爬起身做農夫，齊齊餵飼動物。當地綿羊趣致可愛，晉熙圍住綿羊氹氹轉，玩到唔捨得走，Carol就幫手餵馬匹，話咁快就上手。
高空踩鋼線練膽量
玩完農場，兩母子齊租船出海釣魚，當地海洋水質靚，魚量豐富。一放魚餌，唔使五分鐘就釣到大魚。不過，Carol愛護海洋，將魚獲一一放回大海。兩母子嫌未夠喉，跑去玩埋出名刺激嘅歷險活動，手牽手挑戰高空踩鋼線滋味。
鋼線離地有成六米高，Carol都嚇到個心卜卜跳，但為鍛陳兒子膽量，惟有頂硬上。佢鼓勵兒子向前望，不要往下看，最終有驚無險完成歷程。Carol坦言，囝囝歷險完後果然大個咗，所以辛苦啲都係值得。臨走前，兩母子狂掃新西蘭鮮甜蜜糖及羊脂潤膚霜，滿載而歸。
卓妮