街燈露電線嚇驚途人
街燈電線外露左穿右插，路政署被質疑「亂咁嚟」！北區居民劉先生發現，粉嶺及上水一帶有多組街燈電線外露逾年，其中粉嶺和睦路、上水天平村及新運路三組燈電線更互相穿搭，外蓋卻被打開，不滿路政署久未維修，罔顧市民安全，「開頭見到啲線左飛右飛，以為只係臨時措施，點知過咗成年都仲係咁，你話如果漏電點算？」
路政署發言人表示，接獲投訴後已派員檢查，已即時維修有鬆脫燈柱外蓋，但強調所有路燈運作正常。發言人又指，安裝於路燈上的架空電線，乃地下電纜故障時臨時裝設，乃路燈系統運作的慣常措施，待地下電纜維修完成後，當局才會移除相關臨時架空電線裝置。
「搞咗成年都叫做『臨時工程』，係咪要真係漏電，搞到有人受傷先完到工？」劉先生不滿路政署工程「大歎慢板」，並促請署方盡快完成維修。