中環出更：晏紫榮升媽咪誕兔女郎
有「中國舒拉寶娃」之稱嘅中國網球國寶晏紫，自從懷孕後銷聲匿迹近十個月，近日終於傳出好消息。晏紫爸爸證實，囡囡已於前日下午喺香港順利誕下一名千金，母女平安，認真可喜可賀。
晏紫丈夫係信義玻璃太子爺李聖根，早前老爺李賢義曾經同卓妮講過，新抱仔確係佗緊BB女，但未知係兔女郎定係小龍女。晏爸爸接受內地報章訪問時爆料話，囡囡預產期原本係一月十四日，但過咗三日至生，老人家一度好緊張，好彩囡囡最終順產，為李家添咗名新成員。
李娜微博祝福
晏紫嘅老拍檔李娜第一時間喺微博送上祝福，呢兩日李娜及彭帥出賽，晏紫仲發短訊表達關心，可見佢精神狀態唔錯，仲好關注網壇動靜添！晏紫粉絲都好關注佢產後會否復出，晏爸爸話，依家最緊要等囡囡身體恢復咗先，下一步至諗係咪打番波。不過，老人家估計，阿女應該唔會就此收山，但球迷就要等吓喇！