中環出更：龔仁心同律師High Tea密斟
華懋慈善基金主席龔仁心前排自動減人工回饋社會，每月只收一百蚊象徵式人工，仲瞓晒身參與慈善及義工工作。尋日下午四點鐘，卓妮就見到龔仁心同兩位男士坐喺中環置地廣場間Cafe Landmark歎下午茶，其中一位男士就係華懋慈善基金代表律師何文基，另一位係姓陳嘅友人。佢哋邊歎茶邊密密斟，唔通係商量緊撤換遺產管理人嘅事？
龔仁心去年講過，對於遺產管理人對捐款行善諸多阻撓感到好不滿，搞到佢向多個慈善團體開「空頭支票」，內心不是味兒，去年十一月已經有意撤換管理人。尋日佢同何文基及陳姓友人傾咗足足有半小時，冇幾耐何文基先走，剩下龔仁心與友人繼續斟，大約十五分鐘後先至雙雙離開。
話積蓄夠使費
卓妮上前同龔仁心打招呼，佢話撤換遺產管理人嘅事，已交由律師去處理，現時排緊期上庭喎，但佢哋飲茶只係傾平常嘢。卓妮又問佢依家月入只得一百蚊，咁有冇享用到華懋嘅福利呢？佢就笑笑口話，自己一向都有樓住o架啦，只係醫療福利有時會用到。佢仲話，自己做咗幾十年醫生，唔多唔少都有啲積蓄嘅，夠晒平時使用喎。