中環出更：寶島時裝秀大吹「台」風
年關將近，大家買咗靚衫送舊迎新未？尋日會展有場「台北魅力時尚展演」，騷盡台灣十二個時尚品牌嘅精心設計，卓妮咁貪靚梗要去湊熱鬧啦。期間見到港澳台灣同鄉會新任會長賴李承美，佢對展現故鄉文化以及環保概念嘅設計十分欣賞，仲心思思買番幾件，認真撐場。
同場現身嘅仲有負責帶隊參展嘅台灣紡織業拓展會秘書長黃偉基、台北貿易中心總經理劉錫威以及香港貿易發展局副總裁周啟良等人，眾人對華麗與新潮兼備嘅台灣設計師作品，睇到入晒神。
賴太欣賞原住民設計
啱啱接任同鄉會會長嘅賴太，幾忙都要嚟打氣，佢係首位女會長，服務鄉親嘅熱誠十足。當日佢喺百忙之中抽身去睇騷，仲逐個攤位去尋寶，期間被色彩繽紛嘅靚衫深深吸引，細問之下，原來係台灣知名設計師高勝忠（ANDRE）嘅自家品牌。設計師係排灣族原住民，最擅長將原住民獨有嘅圖騰融入設計，加上剪接手法將鮮艷嘅色塊拼湊成幾何圖形，難怪咁引人注目。
現場仲有以環保為訴求嘅品牌「大愛」，佢哋係台灣知名慈善機構慈濟功德會旗下企業，特色係用回收膠樽循環再造。賴太對佢哋嘅環保信念好欣賞，仲睇中一件設計精緻嘅黑色外套，話要買番件以示支持。