政情：陳恒鑌變春牛圖牧童
各大政黨趁農曆新年紛紛擺年宵做宣傳，好多議員仲落區寫揮春或自行印製賀年卡，尋日我哋就收到荃灣區議員陳恒鑌（Ben）嘅自製通勝「春牛圖」，創意十足。阿Ben粉墨登場做春牛圖中嘅牧童，主力關注其選區內嘅交通問題，並提出解決辦法，同時亦有一篇章提及區內嘅發展，咁落力，莫非要為九月立法會選舉擔大旗出戰新界西造勢？
阿Ben喺○八年立法會選舉都有跟民建聯（民記）條隊出選，一直被視為黨重點栽培嘅新星，進身立法會都唔係無機會。
咁啱我哋又收到一張民記新界西議員一齊舞龍嘅單張，舞龍頭嘅竟然唔係民記黨主席譚耀宗，而係身兼鄉議局副主席嘅張學明，咁譚Sir去咗邊呢？原來去咗舞龍珠牽引住龍頭，莫非暗示譚Sir會退居幕後做軍師？