政情：鄭基恩榮升男拔校長
猛人輩出嘅拔萃男書院，校長之位終於「名花有主」，精通音樂嘅副校長鄭基恩（Ronnie），將接替八月退休嘅校長張灼祥。唔少「男拔仔」尋日紛紛喺討論區留言，睇嚟大家對Ronnie都幾有興趣喎。
男拔校董會前日拍板，宣布委任Ronnie接棒。呢位「候任校長」管理功力有幾深，有待考證，但肯定嘅係好唱得，曾多次披甲上陣，帶領男拔合唱團橫掃多個國際獎項，最近一次，更威水到勇奪世界冠軍，建樹咁多，做校長一啲都唔奇。
據聞校董會亦對Ronnie充滿信心，聽聞張灼祥在位時，曾聘請公關公司幫學校搞活動，但輪到Ronnie上位後，校方將唔會再用公關公司，睇嚟Ronnie想親自同傳媒「過招」，作風好親民喎。男拔一直話要發展國際文憑課程，Ronnie上任後，相信計劃無變，學生都期望呢位音樂奇才，繼續幫男拔省靚招牌。