中環出更：莎姐細女誕麟兒湊好字
自由黨副主席周梁淑怡（莎姐）近年屋企人丁旺盛，兩位寶貝女兒智美同智琪係咁接力生BB。前晚莎姐細女智琪誕下第二胎，係個孫仔，話咁快莎姐已有四粒金孫，認真開心。
卓妮早前同大家預告過，智琪臨盆在即，但連婆婆莎姐都唔知今次係弄瓦定弄璋，事關佢話囡囡鍾意玩驚喜，唔想一早知道肚裏面嗰個係仔定係女喎。智琪喺○九年中已誕下一女後，今次追番個男丁，湊成個「好」字。
改名過程非常民主
卓妮好想知個BB改咗乜嘢名，點知莎姐話仲未改名住，因為佢哋為BB改名嘅過程非常民主，大家都有權表達意見，所以意見好多，按照過往嘅經驗，未到最後一分鐘都好難有決定喎！
自從莎姐大女智美喺○七年添咗第一名孫女之後，智美、智琪就努力造人，係咁鬥生BB。○九年智美追番個男仔，智琪就生個B女，今次智琪再下一城，兩姐妹已分別有一男一女，認真完美。