可惡，實在太可惡嘞！
新年流流本來喜氣洋洋，如果碰啱初誕麟兒，理論上喜上加喜。弊就弊在香港醫療事故不斷，喜事往往變成悲劇。功夫茶真係想問一問伊利沙伯醫院，醫生嘅使命究竟係救人定係害人呀？
最新一單醫療事故係咁嘅，歐先生同取得居港權嘅泰國裔太太結婚七年終於一索得男，三十一歲嘅歐太懷孕後一直喺伊利沙伯醫院產檢，預產期係今年一月二日。醫生經常提醒歐太，令郎身形大過一般同周數嘅胎兒，可能需要剖腹分娩。
去到元旦日，醫生認為胎兒已經足月，安排歐太分娩。之但係咁，入產房後藥物催生整日無效，最終採用吸吮法試圖將嬰兒吸出，但只能吸出頭部，身體留於母體。簡單咁講，嬰兒出現「肩難產」，肩部卡住無法滑出。
既然係咁，係咪應該即時轉用剖腹分娩呀？本來梗係應該啦，可惜醫生唔知點解硬頸到極，堅持歐太能夠自然分娩。歐太出盡九牛二虎之力都冇辦法成功生產，醫生先至剪開陰道，送入手術室誕下九磅六安士嘅男嬰，前前後後拖咗三十六小時。由於嬰兒身體受壓超過二十分鐘，令腦部嚴重缺氧，右邊鎖骨骨折，必須入住新生嬰兒深切治療部。
腦部嚴重缺氧有乜後果？即使小寶寶有幸存活，亦都會出現大腦痙攣，一生從此被摧毀！
唉，講到呢度功夫茶真係眼濕濕。人哋初為人父母者，一心一意迎接活潑精靈嘅新生命降臨世上，以後一家人盡享天倫之樂，奈何就係因為醫生食古不化，拒絕剖腹分娩而釀成慘絕人寰嘅倫理悲劇。難怪悲憤欲絕嘅歐先生批評醫生冇責任感，知道太太唔係土生土長嘅香港人就唔着緊，實在有種族歧視之嫌。
到底係咪種族歧視呢？即使唔係，院方嘅做法都十分可惡，有理由相信伊利沙伯醫院相關人等都係腦殘一族，無辜辜害到人報喜變報憂。如果唔係院方腦殘，真係解釋唔到點會拒絕開刀搶救。庸醫劣護令人費解嘅冷漠表現，同見死不救有乜分別？同延誤救治又有乜唔同？
所以話啫，香港嘅醫療系統愈來愈信唔過，公立醫院固然問題多多，私家醫院同樣弊端處處。記唔記得浸會醫院曾經將一個初生嬰兒跌落地呀？更加可惡嘅係，事後居然遲遲都唔通報。
講到尾最腦殘嗰個肯定係食衞局局長周一嶽，醫療事故多成咁，佢居然仲有心情走去唱歌獻世喎，吹脹！
功夫茶仍然都係嗰句，千祈千祈唔好病，利用身體健康抗衡腦殘官僚，否則唔病死都激死！