政情：長毛接掌丐幫博翻身
「丐幫」社民連喺區議會選舉大敗，加上財困傳聞不時傳出，可以話係山窮水盡。但佢哋對立法會選舉仍然雄心壯志，一心要喺港九、新界五區都擺人出選，新界東依然有梁國雄（長毛）坐鎮，據聞盤據港島十幾年嘅曾健成（阿牛）主動提出空降新界西，希望博一博，而副主席吳文遠亦有意去港島出戰，希望喺比例代表制下可以成功偷雞。
喺區議會選舉元氣大傷嘅社民連，二月就會改選，屆時將會由長毛出任主席，副主席繼續由吳文遠同鄧徐中連任。新一屆內閣將主攻選舉事務，長毛自己當然留守新東，而佢張名單一如以往，只會得自己一個。至於剛剛喺東區失落區議員席位嘅阿牛就會轉戰新界西，主要係貪嗰度多基層，議席又有九個咁多，分分鐘萬零票就入到局，有得博下。
至於港島嘅空缺，聽聞副主席吳文遠都想小試牛刀，佢哋嘅如意算盤，係港島區無乜年輕候選人，希望打住專業、年輕嘅旗幟，喺港島區殺出重圍喎。由於公民黨今屆有可能只派陳淑莊一條名單出戰，社民連估計可以盡吸公民黨剩餘票，或者搶走工黨何秀蘭嘅部分票源。
派人落九西撼毓民
九龍東方面，前主席陶君行捨我其誰？至於九龍西方面，佢哋明知硬撼人民力量黃毓民無好結果，但都會擺人落去，費事選舉時畀人民力量獨大一方，氣勢即刻比下去。
有社民連人士承認，佢哋五區盡出，當然唔會妄想認為可以拎晒五個席位，但認為如果次次都係得長毛贏，對社民連好唔健康，所以點都要扶植啲新人上去，贏當然好，輸亦可以吸收經驗，為四年後作好準備。
打選戰就好似燒銀紙，社民連咁搞法，根據立法會選舉候選人經費上限計算，要用嘅錢差唔多成千萬。究竟錢從何來？
社民連高層就諗到一條「絕橋」，據聞佢哋想打破丐幫傳統，向會員收取月費，而且一啲都唔平，收成每個月一百蚊，計起一年就要成千二蚊，真係要考驗吓啲黨員對個黨有幾忠心。
除咗收會費，社民連未來都會搞幾次大型籌款，總之首要工作，就係周圍撲水，如果唔係都好難搞得出咩花臣。