中環出更：阿壎拉頭馬讚愛駒有性格
有「新公職王」之稱嘅王桂壎卸任律師會會長之後仲忙過以前，除擔任稅務上訴委員會小組副主席、機場管理局成員、香港國際仲裁中心主席等公職外，最近又獲委任為版權審裁處主席，仲幫本港三間大學做嘢，真係百足咁多爪。
卓妮尋日喺馬場見到阿壎同太太，佢同馬會大董周永健以及一眾大狀共同擁有嘅良駒「金榜題名」出賽十次以來首次奪冠，大家興致勃勃齊拉頭馬，並瓜分近三十萬元獎金。阿壎話，呢隻馬好有性格，唔鍾意跟住人跑，畀人追住就愈戰愈強喎。
阿壎好忙，但好享受忙碌所帶來嘅滿足感。卓妮問王太介唔介意老公忙到陪唔到自己，王太話：「咁咪我陪佢囉，佢去邊我就去邊。」不過阿壎都好識得氹老婆，王太身上一套金珍珠耳環、頸鏈同戒指，都係老公送嘅。
蒙德揚戥人高興
信興集團副主席蒙德揚都拉頭馬，不過隻冠軍馬「華美之星」係佢老友劉英華夫婦嘅，昨朝佢喺廈門抽時間趕返嚟捧老友場，十分畀面。