中環出更：郭少明步行籌款大發「皮」氣

太子珠寶鐘錶主席鄧鉅明同家人合組「幸福三人組」，莎莎老闆郭少明就反傳統，以Moschino皮褸襯Ray Ban烏蠅黑超，十足行貓步。

鄧鉅明親子裝上陣

擔任籌募委員會主席嘅郭少明一身「皮氣」到場，行山都不忘保持靚仔樣。佢同近七十名莎莎員工齊組隊，認真捧場。

鄧鉅明（右）一家三口手牽手行百萬行。（何偉鴻攝）

曹棨森（左）及太太帶同愛犬Bianco齊齊去支持公益活動。（被訪者提供）

卓妮留意到，郭生件Moschino皮褸設計別致，左肩上有一個足球logo，同牌子嘅西褲，就係後褲袋有「足球樣」，名副其實係「有前有後」。佢對黑色皮鞋係特別窄長嘅尖頭設計，難得行起嚟都一樣咁舒服。

鄧鉅明就以輕裝上陣，同太太及八歲囝囝Eric穿上親子運動裝。鄧家平日訓練有數，一有時間就行山。鄧鉅明話，心水勝地係迪士尼樂園附近嘅迪欣湖，貪嗰度風景優美，山路唔多，行得好relax。今次出擊行「百萬行」，認真濕碎。

展望今年經濟，鄧鉅明力排眾議話好樂觀，仲磨拳擦掌想買舖長揸。佢話，只要揀啱靚位，長線一定賺。公司去年業績報喜，增長超過百分之五十，荷包脹卜卜，買舖又點會手軟！？

電能實業尋日亦派隊支持，管理層及員工有過千人出席。集團董事總經理曹棨森夫妻檔現身，更出動白雪雪愛犬Bianco，途人對呢隻「電能公益慈善犬」非常好奇，爭住同佢合照添。

卓妮