嘩嘩嘩！睇怕二○一二年可能真係世界末日喎，大家真係要做足心理準備。
千祈唔好話功夫茶鼓吹迷信，末日凶兆確係陸續有來。美國阿肯色州連續第二年除夕有大量黑鳥屍體從天而降，挪威北部一個海灘亦驚現超過二十公噸死魚，至於香港，最得人驚嘅凶兆莫過於添馬艦新政府總部居然變成惡菌溫床，無處不在嘅退伍軍人症桿菌搞到身處其中嘅大官小吏人人自危！
新政府總部號稱「政治心臟」，之但係被稱為「門常開」嘅建築設計竟然變成「空心老倌」，心臟地帶無心臟。喂，空心嘅新政府總部象徵乜嘢呀？咪就係冇心冇肺囉，心臟位置穿咗大窿嘅特區政府監察不力導致惡菌傳播，花費五十億元公帑打造面子工程換來國際笑話。
學似堪輿學家話齋，門常開設計中空，會遇上穿心煞，建築物之內嘅人容易患病。其實風水唔一定迷信，好多時候都有科學根據，冇心冇肺嘅設計點都唔及得上四平八穩。再講吖，政治心臟應該只求實用，不求奢華，設計到譁眾取寵簡直大而無當。門常開，菌常來，你都咪話唔係現眼報。
講到冇心冇肺，功夫茶想起一個故事。話說商朝紂王手下有一位賢臣比干，由於犯顏直諫而被紂王處以剜心之刑，即係挖走心臟咁解。之不過咁，比干得到姜子牙法術保護，服食神符之後可保五臟六腑，即使挖走心臟仍然不死。可惜當中有一項條件，比干如果路上遇見有人賣空心菜，必須問「人若是無心如何」，如果菜販回答「無心還活」，比干可保一命，如果菜販回答「無心即死」，就會立即斃命。結果唔好彩，比干聽到一名女菜販話「人無心即死」，即時一命嗚呼。
呢嗱，若然將新政府總部喻為比干，咁邊一個係處以剜心之刑嘅紂王呀？冇錯嘞，咪就係施政無道嘅煲呔曾囉！
煲呔曾即使唔係紂王，肯定都係一個瘟神。專家直指新政府總部驗收程序不妥善，懷疑與倉促動工以及急於入伙有關。立法會議員直斥曾蔭權好大喜功，為求成為第一個喺新總部辦公同埋新立法會大樓宣讀施政報告嘅香港特首，強求趕工入伙導致自作自受兼且連累同事，要為事件負上最終責任。簡單咁講，煲呔曾係招惹惡菌嘅瘟神。雖然今年六月就夠鐘送走瘟神，不過門常開仍然冇心冇肺，未來新特首實在難以有運行。
唉，諗起都悲哀，香港回歸十五年以來禍患不絕，而上大人又撒手不管，任得空心老倌醜態百出。既然係咁，回歸到底有乜意義呢？