笑看天下:煲呔曾惆悵怯黃昏

新年運勢,大家都希望有個好嘅開始。《老子》所謂:「道生一,一生二,三生萬物。」春回大地,萬象更新,充滿勃勃生機,你話幾令人心曠神怡!無奈夕陽政府出了個好大喜功嘅煲呔曾,一味要面子工程,搞到:菌生一,一生二,三生萬毒!

「門常開,惡菌湧來」,睇怕係煲呔曾燈火下樓台嘅最佳標誌!日趕夜趕,終於趕出禍患無窮;大佬啊,添馬艦新政府大樓唔係為你一個人服務o架,煲呔曾!帶病教育局局長孫明揚就話「視工作為興趣」啫,之不過在政府總部上班的數千公務員、議員助理就為了兩餐,返工唔使搵命博啩?

家陣「門常開」搞到成個「疫區」咁,人人自危,之所以有今日四面惡菌、八方毒侵嘅哀歌,煲呔曾真係跳落維港水——都洗唔甩係元兇呢個污名!

煲呔曾衰收尾已成定局;管治能力一塌糊塗,視民望如浮雲嘅佢,支持度看來只會更低。孔子說:「吾之於人也,誰毀誰譽?如有所譽者,其有所試矣。」所謂「其有所試矣」,無非是說孔子詆毀或讚美一個人,經過嚴格的考證,經得起歷史的檢驗;換言之,蓋棺有道,唔會亂咁論定。

老朽但知,做事係開工不插彩旗、不搞儀式,直接幹活;而做騷則口號震天,場面轟烈,最後以殘垣斷壁收尾。

煲呔曾一味要威,如今搞出個丟人現眼嘅「門常開、惡菌來」,淪為國際笑話,「政治家」臨收尾上演惆悵怯黃昏,人未走,千夫指!

施友朋