中環出更：詩閣太子爺 專攻潮男市場
度身訂造頂尖香港名牌詩閣（Ascot Chang）喺全球有無數擁躉，紳士名流對佢哋嘅優質布料及精湛工藝讚不絕口。早前卓妮喺一個活動上，見到詩閣已故創辦人張子斌嘅孫仔張奕庭（Justin），佢着上自家品牌粉紅色格仔靚恤衫，高大嘅身形加上陽光笑容，顯得朝氣十足，將呢個逾半世紀嘅招牌省得靚一靚。
同「長輩」拍住上
身為詩閣第三代後人，Justin早已做好加入家族生意嘅準備。佢畢業於美國名校康奈爾大學嘅製衣管理，返港前曾喺詩閣紐約分公司做銷售員，依家同詩閣董事總經理，即係叔公張德祥嘅囝囝張宗豪一齊打理另一個年輕品牌TCNY。兩人雖然唔同輩但年紀相若，實好啱傾。
Justin話，詩閣嘅客戶路線較成熟，佢十幾歲時都唔鍾意着自家衫，所以TCNY打算轉型推出有辦試身嘅訂造服務，專攻追求貼身剪裁嘅潮男市場，預計下月初開張，屆時勢將引起一陣熱捧喇！