中環出更：孫太闖「毒廈」 防惡菌蔓延
新政府總部被退伍軍人症桿菌攻佔後，淪陷為「毒廈」，更搞到教育局局長孫明揚感染退伍軍人症，到依家仲喺屋企休養緊，究竟會復工定係辭職唔撈，仍然無人知。不過，前日我哋見到孫太鍾小芬隻身獨闖滿布細菌嘅「毒廈」，仲要抽住一袋二袋嘢離開，唔通係為孫公撤退新政府總部做足準備？
處理生果籃
卓妮四出打聽後，原來係好多教育團體送咗生果籃去孫公辦公室，以示慰問，但孫公由入院至出院後都無返過「毒廈」，所以十幾個生果籃就擺晒喺辦公室度發臭。孫太眼見新政府總部已經布滿惡菌，如果多幾個爛生果，簡直毒上加毒，所以寧願冒住被感染嘅危險，都要勇赴疫區攞走啲生果。
不過，孫太去視察孫公辦公室都唔係壞事，因為一個唔覺意又有其他災難發生，孫太睇定環境嘅話，當有乜依郁要撤退時都走得快。