中環出更:黃錦康耍太極 徒手碎雲石

前晚灣仔會展中心刀光劍影、高手雲集,氣氛既緊張又搞笑,事關美聯集團舉行周年派對,逾二千名賓客及員工共聚一堂。一眾管理層粉墨登場,表演舞龍、鐵錘打爛鑊等節目娛賓,娛樂性十足,唔知仲以為慈善籌款。太極功夫耍家嘅副主席兼董事總經理黃錦康(Albert)就輕鬆表演徒手碎雲石及鐵尺,真人騷博得滿堂喝采。

Albert嘅太極氣功深不可測,講嘢又風趣幽默,睇佢表演認真開心。佢公開表演過隔山打牛、無影手擊碎木板等神技,睇過嘅人莫不拍爛手掌。當晚佢接連表演徒手碎雲石及鐵尺,只見佢輕輕運氣後發力,瞬間雲石及鐵尺已被劈爛晒。

當晚唔少城中名人現身撐場,包括有「趙樓神」稱號嘅長實執董趙國雄、華懋集團售樓部經理吳崇武、裕泰興董事總經理羅守耀等。趙樓神話,多年來長實樓盤幾乎三分之一係美聯幫手賣嘅,佢盛讚美聯有強勁嘅銷售團隊,所以幾忙都要嚟打氣。

黃建業籲員工攬「安全帶」

一向低調嘅美聯主席黃建業,與太太及三名子女齊現身。淡定穩重嘅大女黃靜怡現任集團副主席,頗有乃父風範。佢宣布今年所有文職員工有花紅,台下一陣歡呼聲。不過,黃建業預告今年日子唔好過,要員工攬實安全帶,以拚搏精神迎接新一年。

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!