中環出更：華叔逝世周年 書房搬港大
支聯會創會主席司徒華逝世一周年，華叔家人遵照佢嘅遺願，將個人藏書同書信檔全數完整保留，仲將其中九成、逾一萬件收藏品捐晒畀香港大學圖書館特藏部，為遺物提供一個好嘅「歸宿」，大家亦可對華叔一生嘅思想同生活有更深入了解。不過，有部分私人書信遺物涉及私隱，相信要多年後才能解封。
「司徒華書房」尋日舉行移交儀式，港大校長徐立之、華叔胞妹司徒嬋、司徒娟、胞弟司徒強等一家都有出席。姪仔司徒元大爆唔少華叔鮮為人知嘅一面，好似華叔細個唔鍾意睇兒童讀物，反而做咗「兒童報」總編輯後，佢為咗增加創作靈感先開始睇。藏品唔少得華叔最愛嘅杜甫同魯迅詩集，仲不乏異國文學作品。
華叔愛書係人都知，睇書嘅種類仲好廣泛。原來佢愛書愛到已經唔係上書局逐本買咁簡單，而係由書局寄張清單畀佢，佢剔好想要嘅書之後，等書商成箱書寄到府上。今次捐出藏書中，有兩箱書係華叔未睇過，事關係佢病重時訂落，可惜仲未嚟得切開箱已仙遊。
畫作流露共產思想
值得一提係華叔少年時珍貴嘅相片、畫作同文章，其中一幅華叔喺紅磡街坊公立學校做首任教職員嘅合照，同場仲有佢嘅紅顏知己黃少容。另外一幅前蘇聯作家高爾基肖像畫作，係華叔十七歲以鋼筆繪畫，可以想像佢年紀輕輕已經隱約流露出共產主義思想。仲有華叔喺學友社幫社友補習時，好有心機咁用鋼筆寫成嘅油印教材同筆記，可見佢對教育工作幾咁有熱誠。
