政情：鄭威濤投「日本一」賑災
日本東京築地魚市場今日會拍賣象徵好運嘅「日本一」藍鰭吞拿魚王，亦係自日本去年發生地震後首個新春拍賣日，旗下包括板長壽司等食店嘅和之味集團董事總經理鄭威濤（Ricky），將會第五度參與競投。不過，Ricky就話今年嘅「日本一」唔會運返香港賣，事關要留番啲好運畀日本災民，絕對唔係因為怕咗環保團體咁話。
其實發生地震後，Ricky一直好關心當地情況。去年六月喺佢赤坂分店附近有間酒店改咗做災民臨時住所，佢就請嗰度三百幾個災民免費喺佢間壽司店食足一個月。不過，依家啲災民搬走咗，間酒店亦都冇再營業喇，Ricky就喺壽司店設立東北支援捐款箱，至今已籌到成一百四十萬日圓（近十四萬港元）。
Ricky話︰「地震之後日本經濟係咁沉，當地人嘅笑容少咗，所以今年想將啲好運留番畀佢哋！」所以如果今年佢又競投成功，就會將「日本一」整成壽司分畀災民。